გამოაქვეყნე შენი სტატია

 

კეთილი იყოს თქვენი მობრძანება PCMania-ს ავტორთა და კონტრიბუტორთა ლიგაში!

თუ გსურთ წერა და გაინტერესებს ისეთი თემები როგორიცაა ინტერნეტი, სოციალური მედია, კომპიუტერული მოწყობილობები, ვიდეო თამაშები და ზოგადად საინფორმაციო და საკომუნიკაციო ტექნოლოგიები, მაშინ შეიძლება PCMania თქვენთვის საუკეთესო პლატფორმა აღმოჩნდეს.

ჩვენს ვებ-გვერდზე ვწერთ ქართულენოვან სტატიებს.  ვწერთ ყველაფერზე რაც ეხება საინფორმაციო ტექნოლოგიებს (ან შეიცავს მის ელემენტებს) და ამავდროულად საინტერესო, შემეცნებით-გასართობი და სასარგებლო იქნება მკითხველისთვის. ჩვენ გვსურს რომ PCMania-ზე წაკითხული ყოველი სტატიის ბოლოს, როგორც დამწყებმა ასევე საკითხში გარკვეულმა მკითხველმა შეიტყოს საინტერესო ინფორმაცია ან ისწავლოს რაიმე ახალი.

ვის ვეძებთ:

– ვეძებთ პოტენციურ კონტრიბუტორებს რომელთაც შეუძლიათ მინიმუმ სამოყვარულო დონეზე, ქვემოთ მოცემული პირობების დაცვით სტატიების წერა.
– კანდიდატს უნდა გააჩნდეს მოხალისეობის სურვილი.
– სასურველია კონტრიბუტორი აქტიურად ჩაერთოს საქმიანობაში და სტატიები პერიოდულად გამოაქვეყნოს.

რას ვეძებთ:

– ინსტრუქციის ტიპის (How to), ანალიტიკურ, განხილვის, ბიოგრაფიულ, ისტორიულ ან შემეცნებით-გასართობი ტიპის სტატიებს.
– სტატია უნდა იყოს ზომით 250 სიტყვაზე მეტი, კარგად დასათაურებული და გრამატიკულად გამართული.
– სტატია უნდა ეხებოდეს საინფორმაციო ტექნოლოგიებში არსებულ პროდუქტებს, მიმდინარე მოვლენებს და ამ სფეროში მოღვაწე ადამიანებს ანდ ორგანიზაციებს.
– სტატია უნდა შეიცავდეს შესაბამის დასურათებას (მინიმუმ ერთი სურათი, რეზოლუცია 600px ან მეტი) წყაროს მითითებით.
– სასურველია საჭიროების შემთხვევაში თან ერთვოდეს სხვა დამატებითი დამხმარე ვიზუალური მასალა (გალერეა, ვიდეო და ა.შ.).

რას არ ვეძებთ:

– არასტრუქტურირებულ კონტენტს, მწირ და ზედაპირულ ტექსტს და შინაარს.
– “ვარეზ”, პირატულ, სამუშაო გარემოსთვის და მოზარდებისთვის შეუსაბამო კონტენტს და მათ ლინკებს.
– პროგრამების განახლებების ცარიელ ანონსებს, განხილვისა და ანალიზის გარეშე.
– უშინაარსო ფოტოგალერეას, სიებს და ა.შ.
– ზედმეტი დოზით იუმორს და ქარაგმებს ტექსტში.
– მიზანმიმართულ სარეკლამო ტიპის სტატიებს.

სხვა მოთხოვნები:

– სტატია არ უნდა იყოს კოპირებული სხვა ქართულენოვანი ელექტრონული თუ ბეჭდითი წყაროებიდან.
– თუ სტატია არის პირდაპირი თარგმანი უცხოური წყაროდან, ან თარგმანთა კრებული სხვადასხვა წყაროებიდან, აუცილებლად უნდა მიეთითოს ინფორმაციის წყარო.
– სასურველია სტატია არ იყოს დროსთან სენსიტიური და ადვილად მოძველებადი.

რა ტიპის სტატიები შეგიძლიათ გამოგზავნოთ:

დააჭირეთ სათაურს დეტალების ჩამოსაშლელად
ინსტრუქცია
ინსტრუქციის ტიპის სტატია უნდა შეიცავდეს კომპიუტერულ საკითხებთან დაკავშირებულ გარკვეული პრობლემის გადაჭრის გზებს. იგი აუცილებლად უნდა შეიცავდეს სტატიისთვის საჭირო ელემენტებს (შესავალი, დასკვნითი ნაწილი და ა.შ.) და ამავდროულად ეტაპობრივად, ნაბიჯ-ნაბიჯ აღწერდეს პრობლემის გადაჭრის პროცედურას.

მაგალითი სათაურები:
როგორ დავაინსტალიროთ ოპერაციული სისტემა ფლეშ-დრაივიდან
როგორ შევამციროთ ენერგიის მოხმარება ტელეფონში
და ა.შ.

ანალიტიკური

ანალიტიკური სტატია უნდა უნდა აანალიზებდეს არსებულ სიტუაციას ან მოვლენას საინფორმაციო ტექნოლოგიების სფეროში. სასურველია სტატია იყოს ნაკლებად სუბიექტური და მარტივი აღსაქმელი.

მაგალითი სათაურები:
რას ელის Apple სტივ ჯობსის გარეშე?
საინფორმაციო ტექნოლოგიების როლი განათლებაში იზრდება
Google-ს მომავალ 10 წელიწადში დიდი გეგმები აქვს
და ა.შ.

განხილვა

განხილვის ტიპის სტატია მკითხველს აცნობს რაიმე ობიექტს, მის თვისებებს, დადებით და უარყოფით მხარეებს. ობიექტი შეიძლება იყოს ახალი ლეპტოპი, სმარტფონი, ვიდეო თამაში, აპლიკაცია, პროგრამა, ინტერნეტ რესურსი და ასე შემდეგ. ისევ როგორც ანალიტიკურ სტატიაში, განხილვაც სასურველია იყოს ნაკლებ სუბიექტური გარდა იმ შემთხვევისა როდესაც არსებობს სუბიექტურობის საჭიროება.

მაგალითი სათაურები:
ახალი iPhone და მისი შესაძლებლობები გაგაოცებთ
Android-ის აპლიკაცია რომელიც ამინდის პროგნოზს ხმით გადმოგცემს
რითი გამოირჩევა Assassin’s Creed-ის სიუჟეტი სხვებისგან
და ა.შ.

ბიოგრაფიულ-ისტორიული

ასეთი ტიპის სტატია უნდა იყოს ადამიანების, ორგანიზაციების ან მოვლენების შესახებ. მაგალითად შეიძლება იყოს ცნობილი ან საინტერესო პიროვნების ბიოგრაფიული ჩანახატი. რომელიმე კომპანიის ისტორიის და კულტურის გახსენება. ან ისტორიული მოვლენების შესახებ თხრობა.

მაგალითი სათაურები:
რა ხდებოდა საქართველში საინფორმაციო ტექნოლოგიების სფეროში 90-იან წლებში
როგორ დაიწყო ბილ გეითსმა ოპერაციული სისტემების რევოლუცია
Facebook-ის დაარსების შთამბეჭდავი ისტორია
და ა.შ.

შემეცნებით-გასართობი

შემეცნებით-გასართობი ტიპის სტატია უნდა იყოს პოზიტიური/მხიარული ხასიათის ტექსტი ან გრაფიკული მასალა (რასაც მოყვება ტექსტი). სტატიაში შეიძლება განხილული იყოს საინტერესო ფაქტები, მოვლენები, ისტორიები, პიროვნებები, ვიდეო ჩანაწერი ან სხვა მასალა.

მაგალითი სათაურები:
რატომ ქვია Android-ის ვერსიებს ტკბილეულის სახელები
ფილმები კომპიუტერული გენიოსების შესახებ
ყველა დროის 5 საუკეთესო ბიზნეს თამაში
და ა.შ.

 

როგორ დავიწყოთ:

1. კონტრიბუტორი ჯერჯერობით მხოლოდ ჩვენი მოწვევით შეგიძლიათ გახდეთ. დაგვიკავშირდით კონტაქტის ფორმის საშუალებით და მოგვწერეთ თქვენს შესახებ, რატომ გსურთ კონტრიბუტორობა და რის შესახებ აპირებთ წერას.

2. კარგი წარდგენის შემთხვევაში, რედაქტორისგან თქვენ მიიღებთ მოწვევას და მარტივ სააპლიკაციო ფორმას რომლითაც გაივლით ჩვენს სისტემაში რეგისტრაციას.

3. რეგისტრაციის შემდგომ შეგეძლებათ ჩვენს სისტემაში შესვლა, სადაც ხდება სტატიების წერა, მასალების ატვირთვა და ჩვენთვის გადმოგზავნა გადასახედად. სისტემა ძალიან მარტივია და მოითხოვს უბრალოდ ტექსტის პროცესორთან მუშაობის უნარებს (მაგ Word, Pages და ა.შ.). სასურველია წინასწარ გადახედოთ როგორ ემატება WordPress-ის სისტემაში ახალი პოსტი და როგორ დავწეროთ სრულყოფილი ბლოგ-პოსტი

4. სტატიის გამოგზავნის შემდგომ მაქსიმუმ 48 საათის განმავლობაში სტატია გაივლის რედაქტირებას და გამოქვეყნდება ვებსაიტზე.

ველით თქვენს იდეებს და შემართებას!

გაითვალისწინეთ!

ჩვენი მოსალოდნელი თანამშრომლობისდა მიუხედავათ ეს არ არის ოფიციალური სამუშაო შეთანხმება. მიუხედავად ამისა არასრულწლოვანი პიროვნებების მიერ სტატიების გამოქვეყნება უნდა მოხდეს მშობლის ან ზედამხედველის თანხმობით.

რედაქტორი იტოვებს უფლებას სტატიის ავტორთან შეთანხმების გარეშე შეიტანოს სტატიაში შესწორებები, არ გამოაქვეყნოს სტატია ან წაშალოს ავტორისთვის მიზეზთა განმარტების გარეშე. ჩვენ პატივს ვცემთ თქვენს დროს და შრომას და ვიმედოვნებთ რომ ამის საჭიროება არ იარსებებს.

თუ თქვენს მიერ გამოსაქვეყნებლად გადმოცემული სტატია ვერ დააკმაყოფილებს ამ გვერდზე აღწერილ კრიტერიუმებს ის უბრალოდ არ გამოქვეყნდება ვებ-საიტზე.

თუ ამჟამად არ შეგიძლიათ დრო დაუთმოთ სრული სტატიის წერას, ან დიდი ტექსტის დამუშავებას გამართული სტატიის ჩამოსაყალიბებლად, მაგრამ მაინც გსურთ საინტერესო საკითხავი გაუზიაროთ მკითხველს, მაშინ ჩვენი ფორუმი საუკეთესო საშუალებაა ასეთი ჩანაწერების გამოსაქვეყნებლად.